Rahoton da kamfanin dillancin labarai na Anadolu ya wallafa, bisa bayanan Axios, ya ce Netanyahu ya tattauna da Trump ta wayar tarho a ranar Asabar, inda ya matsa masa lamba kan sake amfani da ƙarfin soji bayan zaɓen tsakiyar wa’adin mulkin Amurka na ranar 3 ga Nuwamba.
Sai dai Trump ya fi son a bai wa ƙoƙarin tattaunawar da ake yi damar ci gaba, maimakon gaggauta komawa fagen yaƙi. Rahoton ya ce shugaban Amurkan ya bayyana cewa tattaunawar da Iran na tafiya yadda ya kamata, kuma ba ya gaggawar sake fara kai hare-hare.
A halin yanzu, ƙasar Qatar na taka rawa wajen shiga tsakani domin taimakawa wajen dawo da tattaunawar kai tsaye tsakanin Washington da Tehran. Haka kuma, mataimakin shugaban Amurka, JD Vance, ya aika saƙo ga Mohsen Rezaei, wani babban jami’in tsaron ƙasar Iran, kan yiwuwar sake buɗe tattaunawar hukumance.
A nata ɓangaren, Iran ta ce har yanzu tana musayar saƙonni da Amurka ta hannun ƙasashen da ke shiga tsakani. Kakakin ma’aikatar harkokin wajen Iran, Esmaeil Baqaei, ya kuma ce wata sabuwar shawarar diflomasiyya mai matakai bakwai da ƙasarsa ta gabatar za a iya aiwatar da ita cikin kwanaki biyu, idan Amurka ta amince da buƙatunta.
Duk da waɗannan ƙoƙari, har yanzu ba a cimma yarjejeniya ta ƙarshe ba. Ministan harkokin wajen Iran, Abbas Araghchi, ya ce ƙasarsa na jiran amsoshin Amurka kan wasu muhimman batutuwa. Wannan na nuna cewa akwai sauran ƙalubale kafin a samu matsaya da za ta kawo ƙarshen rikicin da kuma rage barazanar sake barkewar faɗa a yankin..
