Gwamnan Bauchi ya jaddada buƙatar inganta tiyatar yara

Gwamnan Jihar Bauchi, Sanata Bala Mohammed, ya jaddada buƙatar inganta harkar kula da lafiyar yara, musamman wajen samar da damar yin aikin tiyata cikin nasara ga yara masu buƙatar irin wannan kulawa.

Gwamnan ya bayyana hakan ne a wajen bikin taron shekara-shekara na 25 na Ƙungiyar Likitocin Tiyatar Yara ta Najeriya, APSON, wanda aka gudanar a jihar Bauchi.

A yayin taron, shugaban APSON, Farfesa Roland Osuoji, ya ce ƙungiyar ta gudanar da ayyukan tiyata kyauta a wasu al’ummomin jihar kafin taron. Ya ce an duba marasa lafiya 1,537, yayin da aka yi wa daruruwan marasa lafiya tiyata kyauta, ciki har da wasu ayyukan tiyata masu sarkakiya.

Shugaban kwamitin shirya taron, Dakta Kefas John Bwala, ya ce manufar ayyukan ita ce rage yawan yara da ke fama da cututtukan da za a iya magance su ta hanyar tiyata. Ya kuma jaddada muhimmancin tabbatar da cewa yara da ke yankunan karkara da wuraren da ba su da isassun cibiyoyin kiwon lafiya sun samu damar samun irin wannan kulawa.