GWAMNATIN TARAYYA TA ƊAUKI MATAKI KAN HAƊA KUƊIN KWANGILOLI

Gwamnatin Tarayya ta yi barazanar ɗaukar matakin ladabtarwa kan shugabannin hukumomin gwamnati da ke karya dokokin bayar da kwangiloli, musamman ta hanyar ƙara kuɗin ayyuka fiye da ƙima.

Sakataren Gwamnatin Tarayya, Sanata George Akume, ne ya bayyana hakan a cikin wata takardar umarni da ya aika wa ministoci, manyan sakatarori da shugabannin hukumomi da kamfanonin gwamnati.

A cikin takardar, Akume ya nuna damuwarsa kan yadda wasu hukumomi ke bayar da kwangiloli ba tare da bin ƙa’idojin dokar sayen kayayyaki da ayyukan gwamnati ta shekarar 2007 ba, wadda aka yi wa kwaskwarima ta hanyar dokar kuɗi ta shekarar 2020.

Ya ce irin wannan dabi’a na haifar da ƙarin kuɗin kwangiloli fiye da farashin da aka amince da shi, tare da hana wasu ’yan kasuwa damar shiga gasa ta hanyar fifita wasu ’yan kwangila.

Akume ya kuma umarci dukkan hukumomin da ke amfani da kuɗin gwamnati da su tabbatar da cewa suna bin dokokin da suka shafi bayar da kwangiloli, tare da tuntubar Hukumar Kula da Sayen Kayayyaki ta Ƙasa domin samun shawarwari.

Gwamnatin ta kuma gargaɗi shugabannin hukumomin cewa duk wanda aka samu da karya dokokin zai fuskanci hukunci. Wannan mataki na zuwa ne a daidai lokacin da ake ƙara nuna damuwa kan yadda ake sarrafa kuɗaɗen al’umma da kuma buƙatar tabbatar da gaskiya wajen gudanar da ayyukan gwamnati.