SOJOJIN NAJERIYA SUN KASHE MANYAN SHUGABANNIN ISWAP A BORNO

Rundunar ta ce an gudanar da aikin ne a ranar 31 ga Oktoba, 2026, bayan mayakan ƙungiyar sun kai hari kan wuraren da sojojin suke zaune a yankin.

Mukaddashin jami’in hulɗa da manema labarai na rundunar Operation Hadin Kai, Kyaftin Mohammed Goni, ne ya bayyana hakan a cikin wata sanarwa, inda ya ce dakarun sun yi amfani da ƙarfin sojojin ƙasa da kuma tallafin jiragen yaƙi wajen fatattakar maharan.

Sanarwar ta bayyana cewa waɗanda aka kashe sun haɗa da Abu Hajara, wanda yake cikin majalisar shawarar ƙungiyar ta ISWAP, da kuma Abul Walid, wani babban kwamanda da ke da kusanci da Ba Shuwa, wanda rundunar ta bayyana a matsayin babban jagoran ƙungiyar a yankin.

Sauran waɗanda aka kashe sun haɗa da mayakan Larabawa guda biyu masu babban matsayi a ƙungiyar. Rundunar ta ce bayan artabun, dakarunta sun kwato makamai da alburusai da kuma na’urorin sadarwa daga hannun mayakan.

Wannan nasara ta zo ne kwanaki uku kacal bayan wani samame a Buni Yadi da ke Jihar Yobe, inda rundunar ta ce ta kashe mayakan ISWAP kusan 55, ciki har da wasu kwamandoji. Rundunar ta ce za ta ci gaba da kai hare-hare domin raunana ƙungiyoyin ta’addanci da lalata sansanoninsu a yankin Arewa maso Gabas.