Yara miliyan 5.5 daga al’ummomin makiyaya da masu ƙaura ba sa zuwa makaranta a Najeriya

Mukaddashin babban sakataren hukumar, Dakta Umar Abdu, ne ya bayyana wannan ƙididdiga yayin wata hira da jaridar Punch a Kano, a gefen wani taron ƙasa da ƙasa na kwanaki uku da ya shafi inganta ilimin makiyaya da sauran al’ummomin da ke fuskantar ƙalubalen samun ilimi.
A cewarsa, al’ummomin da lamarin ya shafa sun haɗa da makiyaya, masu sana’ar kamun kifi da kuma manoma masu ƙaura daga wannan wuri zuwa wani. Ya ce jimillar yawan al’ummomin uku a Najeriya an kiyasta ta kai mutum miliyan 45 da dubu 900.
Dakta Umar Abdu ya bayyana cewa ɗaya daga cikin manyan matsalolin da ke hana yaran samun ilimi shi ne yawan ƙaurar da iyalansu ke yi domin neman wuraren kiwo, kamun kifi da sauran hanyoyin samun abin rayuwa. Wannan yanayi na sa yaran rasa damar ci gaba da karatu a makarantu na yau da kullum.
Ya kuma bayyana cewa hukumar tana da aƙalla ɗalibai miliyan 1 da dubu 900 da suka shiga shirye-shiryen iliminta a faɗin jihohi 36 da Babban Birnin Tarayya, Abuja. Ya ce ana amfani da hanyoyi daban-daban domin kai ilimi ga yaran da ke zaune a wuraren da ke da wahalar isa.
Daga cikin hanyoyin da hukumar ke amfani da su akwai makarantu masu motsi daga wuri zuwa wani, cibiyoyin karatu a ƙarƙashin bishiyoyi da kuma koyarwa ta rediyo. Hukumar ta kuma bayyana shirin kafa cibiyoyin koyon sana’o’i domin bai wa matasa damar samun ƙwarewar da za ta taimaka musu wajen dogaro da kansu.
Sai dai mukaddashin babban sakataren ya ce har yanzu akwai ƙalubale da suka haɗa da ƙarancin kuɗaɗen gudanarwa, ƙarancin malamai, yawan canja wurin malamai, barin karatu da wasu ’yan mata ke yi da kuma wahalar samun damar shiga matakin karatun sakandare bayan kammala firamare.
Hukumar ta ce tana buƙatar ƙarin haɗin kai tsakanin gwamnati, al’ummomi da sauran masu ruwa da tsaki domin tabbatar da cewa yaran makiyaya da masu ƙaura ba su rasa damar samun ilimi saboda yanayin rayuwar iyalansu ba.