Hajiya Sa’a Ibrahim Ta Shiga Sabon Kwamitin Sauraron Kararrakin Laifukan Talla na Najeriya

An ƙaddamar da kwamitin ne a ranar Talata a Abuja, inda Ministan Yaɗa Labarai da Wayar da Kai, Mohammed Idris, ya bayyana kafa kwamitin a matsayin wani muhimmin mataki wajen ƙarfafa gaskiya, riƙon amana da ƙwarewa a harkar talla da sadarwar kasuwanci.
Hajiya Sa’a Ibrahim, wadda ta shafe shekaru tana aiki a harkar yaɗa labarai da talla, na cikin mutane biyar da aka naɗa cikin kwamitin. Mai Shari’a Cecilia M. A. Olatoregun ce za ta jagoranci kwamitin, yayin da sauran mambobin suka haɗa da Musa Ahmed Attah, SAN, Merga Tyowanan Kachina, Esq., da Dr. Ken Onyeali Ikpe.
An kafa kwamitin ne bisa tanadin dokar ARCON ta shekarar 2022, wadda ta bai wa Majalisar Kula da Harkokin Talla ta Najeriya ƙarin ikon sa ido kan masana’antar talla tare da samar da tsarin sauraron kararrakin da suka shafi karya dokokin talla da ƙa’idojin masana’antar.
Yayin ƙaddamar da kwamitin, Minista Mohammed Idris ya buƙaci mambobin da su gudanar da ayyukansu cikin gaskiya, ‘yanci da adalci, tare da yanke hukunci bisa hujjoji ba tare da tsoro ko son zuciya ba.
Shi ma Darakta-Janar na ARCON, Olalekan Fadolapo, ya bayyana kafa kwamitin a matsayin wani babban ci gaba wajen tabbatar da bin doka da ƙa’idojin masana’antar talla a Najeriya.
A nata ɓangaren, shugabar kwamitin, Mai Shari’a Olatoregun, ta yi alƙawarin gudanar da ayyukan kwamitin cikin gaskiya, adalci da ƙwarewa.
Gwamnatin Tarayya ta ce ana sa ran kwamitin zai taimaka wajen samar da ingantacciyar masana’antar talla mai bin doka, tare da ƙarfafa ƙirƙire-ƙirƙire, kare amincewar jama’a da kuma tabbatar da ƙa’idojin ƙwarewa a harkar talla.