Osun: Adeleke Ya Lashe Kananan Hukumomi 19, Oyebamiji Ya Lashe 11

1

Gwamnan Jihar Osun kuma ɗan takarar jam’iyyar Accord, Ademola Adeleke, ya samu rinjaye a ƙananan hukumomi 19 daga cikin 30, yayin da ɗan takarar APC, Bola Oyebamiji, ya samu nasara a ƙananan hukumomi 11, yayin da ake kammala tattara sakamakon zaɓen gwamnan jihar da aka gudanar ranar Asabar.

Sakamakon da aka tattara ya nuna cewa Adeleke ya samu ƙuri’u 511,067, yayin da Oyebamiji ya samu 444,815, inda tazarar ƙuri’un ta kai 66,252. Ɗan takarar ADC, Najeem Salam, ya zo na uku da ƙuri’u 17,180.

A cikin wuraren da Adeleke ya yi nasara akwai Ede North, Ede South, Osogbo, Ife Central, Ife East da Iwo, yayin da Oyebamiji ya samu nasara a wasu ƙananan hukumomi ciki har da Ilesa East, Boripe, Irewole da Olorunda. Daga bisani, INEC ta tabbatar da Adeleke a matsayin wanda ya lashe zaɓen, bayan kammala tattara sakamakon daga dukkan ƙananan hukumomin jihar.