Gwamnatin Kano ta umarci ma’aikatan da suka yi ritaya su bar ofisoshi

Umarnin na kunshe ne cikin wata sanarwa da Babban Sakatare mai kula da harkokin ma'aikata, Abba A. Dangguguwa ne ya sanya hannu a madadin Shugaban Ma’aikatan Gwamnatin Jihar Kano a ranar 6 ga Oktoba, 2026.

Sanarwar ta ce wasu ma’aikatan gwamnati na cigaba da aiki da gudanar da ayyukan hukuma duk da cewa sun kai lokacin yin ritaya.

Ta kuma umarci ma’aikatan da suka yi ritaya saboda shekaru ko tsawon lokacin aiki da su mika dukkan takardun hukuma, kadarorin gwamnati ga wadanda ke karkashinsu nan take.

Sanarwar ta kuma gargadi manyan jami’an gwamnati da su tabbatar da an aiwatar da umarnin ba tare da bata lokaci ba.

Ta ce duk wani jami’in da aka samu yana taimakawa ko amincewa da cigaba da zaman ma’aikacin da ya yi ritaya a bakin aiki zai fuskanci matakin ladabtarwa bisa ka’idojin aikin gwamnati.

Umarnin ya fara aiki nan take.