Shugaban Kungiyar Fulani ta Duniya Ya Dakatar Da Babban Zaɓen Ƙungiyar Fulani Ta Duniya

Sarkin ya bayyana hakan ne yayin wani taron tattaunawa da ƙungiyar ta gudanar a Kano, tare da halartar mambobinta daga ƙasashe 26. Ya ce, bisa la’akari da batun da ke gaban kotu, an dakatar da gudanar da babban zaɓen shugabancin ƙungiyar har sai kotu ta bayar da izinin ci gaba da aikin.

Wannan mataki ya biyo bayan ziyarar da shugabannin ƙungiyar daga ƙasashe daban-daban suka kai wa Mai Martaba Sarkin Kano a Fadar Kano, inda suka bayyana goyon bayansu ga jagorancinsa. A yayin ziyarar, shugabannin ƙungiyar sun ce suna fatan Sarkin zai yi adalci tare da tabbatar da haɗin kan al’ummar Fulani a duniya.

Glob Hub

A nasa jawabin, shugaban ƙungiyar reshen Ghana ya bayyana cewa sun yi wa Mai Martaba mubaya’a tare da kyautata masa zato, yana mai cewa suna fatan zai yi amfani da jagorancinsa wajen haɗa kan al’ummar Fulani da kuma kare muradunsu ta hanyar da ta dace.

Da yake jawabi cikin harshen Fulfulde, Mai Martaba Sarkin Kano ya gode wa shugabannin ƙungiyar bisa yadda suka yi doguwar tafiya zuwa Kano da kuma irin kyakkyawan zato da suka yi masa. Ya kuma jaddada muhimmancin bin doka da mutunta hukuncin kotu wajen warware duk wata takaddama da ta shafi ƙungiyar.

Glob Hub

A cewar Sarkin, ba za a gudanar da babban zaɓen ƙungiyar ba har sai an samu izinin kotu, domin tabbatar da cewa duk wani mataki da za a ɗauka ya kasance cikin tsarin doka. Wannan ya sa aka dakatar da shirin babban taron zaɓen da aka shirya gudanarwa a Kano, har zuwa lokacin da kotu za ta yanke hukunci ko ta bayar da izinin ci gaba.