Tashin Farashin Man Fetur YA Ƙara Jawo Ƙunci a Jigawa

Farashin man fetur a wasu gidajen mai a jihar ya tashi daga kusan Naira 860 zuwa tsakanin Naira 1,400 da Naira 1,500 kan kowace lita, lamarin da ya sake ƙara tsadar sufuri da sauran kayayyaki da ake amfani da su a kullum.

Masu ababen hawa sun ce ƙarin farashin man fetur ya tilasta musu sake duba farashin sufuri domin samun damar biyan kuɗin man fetur da sauran kuɗaɗen gudanar da harkokin sufuri. Hakan kuma na ƙara sanya fasinjoji fuskantar ƙarin kuɗin mota a cikin birane da tsakanin garuruwa.

google

Wasu daga cikin jama’ar da aka zanta da su sun bayyana damuwarsu kan yadda hauhawar farashin man fetur ke shafar kasuwancinsu da kuma kuɗin da suke kashewa wajen zirga-zirga. Sun yi kira ga hukumomin da abin ya shafa da su duba hanyoyin rage matsin da hauhawar farashin man fetur ke jefa jama’a ciki.

Wakilin Premier Radio 102.7 a Jihar Jigawa, Muhammad Abubakar Dutse, ya zagaya wasu sassan Birnin Dutse domin jin ra’ayin masu ababen hawa da sauran jama’a kan tasirin sabon ƙarin farashin man fetur da kuma yadda lamarin ke shafar rayuwarsu.